COMELEC nagahinyu sa mga rehistrado nga manugboto sa pag ‘validate’ kang andang rehistrasyon

User Rating:  / 0

Details

Created on Monday, 16 January 2012 19:18

Published on Monday, 16 January 2012 19:18

Written by Pilar S. Mabaquiao

Hits: 53

SAN JOSE, Antique --- Ang Commission on Elections (COMELEC) naghinyu sa mga rehistrado nga manugboto sa pag "validate" kang andang rehistrayon para sigurado nga makaboto sa maabot nga 2013 nga eleksyon.

Suno kay Atty. Hazel L. Alconga, Election Officer III kang San Jose, Antique, sa banwa pa lang kang San Jose masobra run sa 12,000 ka mga botante ang kinahanglan pa nga i-validate. Kun magdurungan dya sa adlaw nga marapit lamang ang deadline, magurutok dya sa opisina kang COMELEC.

Sa bilog nga probinsya masobra sa 289,000 ang kabilogan nga manugboto. Ang banwa kang Sibalom kag San Jose ang may raku kang porsyento kang manugboto, hambal ni Alconga.

Sin-o ang mga botante nga kinahanglan magpavalidate kang andang rehistrasyon? Suno sa COMELEC, ang tanan nga narehistro nga botante nga wara maka-agi ka pabu-ol kang andang litrato, pirma kag marka kang mga tudlo sa "computer".

Bisan nakaboto na kang nagligad nga eleksyon, kinahanglan gid nga magpavalidate kang personal nga impormasyon sa computer, para makaboto sa masunod nga eleksyon.

Ang COMELEC naga panawagan sa mga opisyales kang barangay sa pagbulig pa-athag sa mga katawhan nga magpavalidate gid para sanda makaboto sa sunod nga eleksyon.

Ang botante dapat magdara kang "valid ID" para madali ang pagkilala kag pag proseso kang andang rehistrasyon.

Sa mga na-deactivate tungod nga sanda wara naka boto kang nagligad nga darwa ka eleksyon, kinahanglan man sanda mag-agto sa opisina kang COMELEC para magpare-activate.

Para sa mga bag-o palang magparehistro, padayun ang pagparehistro sa COMELEC, suno kay Alconga.

Naga apilar gid ang COMELEC sa temprano nga pagpavalidate, pagpare-activate kag parehistro para malikawan ang paggirinutok kun madali na lang ang gintalana nga katapusan nga adlaw.

• < Prev
• Next >