San Jose padayon nga naga ugwad

User Rating:  / 0

Details

Created on Monday, 16 January 2012 18:14

Published on Monday, 16 January 2012 18:14

Written by Margie L.Gadian

Hits: 52

SAN JOSE, Antique --- Darwa ka daragkul nga negosyo kang Esprutingkle Group of Companies nga gina panagihayan kang bataon nga negosyante sa San Jose ang bag-o lang gin inagurahan kag gin buksan sa publiko.

Ang ginbuksan amo ang Monterey Meat Shop, ang una pa lang sa Antique kag PILMICO nutrition store para sa mga sapat.

Sa anang mensahe, si Mayor Rony L. Molina kang San Jose naghambal nga ang San Jose padayon kag madasig nga naga-ugwad. Dya sangka lugar nga manami para sa mga negosyante tungod kang manayanaya nga klema sa pag negosyo kag matawhay man.

Ana ginhikayat ang mga negosyante nga rudya mag negosyo sa banwa.

Gapanurok man si Molina kang naga ugwad nga ekonomiya tungod kang presensya kang daan kag bag-o nga negosyo amo man ang dese nwebe (19) ka bangko.

May mga gasolinahan man nga naga burukas mismo sa sulod kang banwa.

Ginpahayag man ni Molina ang plano kang Robinson's Mall nga magsulod sa San Jose sa pira ka adlaw.

Ang mga Antiquenos nagakalipay gid sa dya nga mga kauswagan tungod ga pakita dya kang naga improbar nga probinsya indo lamang sa ekonomiya kundi pati man sa iban pa nga aspeto kang pag-ugwad parehas kang agrikultura, parangabuhian, turismo kag infrastruktura.

Sa dya nga kauswagan, ang mga lokal nga opisyales nagapanurok nga ang San Jose mangin sangka syudad sa pira ka adlaw.

• < Prev
• Next >