NSO nagahiwat kang una nga 'Family Health Survey'

User Rating:  / 0

Details

Created on Sunday, 14 August 2011 19:00

Published on Sunday, 14 August 2011 19:00

Written by Pilar S. Mabaquiao

Hits: 98

SAN JOSE, Antique -- Ang National Statistics Office (NSO) nagahiwat kang una nga pungsudnon nga Family Health Survey. Ang mga manugpanalawsaw ginpadara na sa mga kabanwahan kang probinsya agud maghiwat kang amo nga survey.

Ginhambal ni Jesus Escote, Provincial Statistics Officer kang NSO sa sangka paghinun-anon nga ang amo nga survey magatipon kang impormasyon tuhoy sa estado kang mga nanay, andang mga kabataan, pama-agi sa pagplano kang pamilya kag iba pa nga topiko nga nasakupan kang ikaayong lawas.

Ang dya nga pagpanalawsaw, suno kay Escote, nagatuyo sa pagtipon kang impormasyon tuhoy sa ikaayong lawas kang mga nanay kag kabataan agud makabulig sa mga ahensya kang gobyerno kag pribado agud makadihon kang programa ukon proyekto para kananda.

Sa Antique ang hubon kang manugpanalawsaw magalibot sa 12 ka mga barangay nga may 16-19 ka mga pamilya nga dapat pamangkuton.

Ang kinahanglan nga magasabat sa amo nga pamangkot amo ang mga babayi nga naga edad 15-49 ka tuig. Ang mga pamangkot nagalakip kang mga impormasyon tuhoy sa nanay kag ana mga bata, mga pamaagi sa pagplano kang pamilya kag ikaayong lawas kang bilog nga pamilya.

Ginhinyu ni Escote ang mga lokal nga pamunu-an sa pagbulig sa mga manugpanalawsaw ilabi na gid sa mga lugar nga budlay agtonan, samtang ang mga manugsabat sa amo nga mga pamangkot ginpangabay man sa pagkooperar agud makatipon kang husto nga impormasyon ang dya nga survey.

Ginalauman nga matapos kadya nga bulan ang pamangkot sa mga panimalay kag ang pagpresentar kang resulta ginapaabot antes matapos ang dya nga tuig.

Ang dya nga survey ginpundohan kang United States Agency for International Development (USAID) nga ginsuportahan kang World Bank.

• < Prev
• Next >