Antique naghiwat kang Indigenous People’s Day

User Rating:  / 0

Details

Created on Sunday, 14 August 2011 18:56

Published on Sunday, 14 August 2011 18:56

Written by Pilar S. Mabaquiao

Hits: 98

SAN JOSE, Antique -- Ginatos ka mga tumandok ang nagtipon sa EBJ Gym Binirayan Hills, San Jose sa paghiwat kang pangkalibutanun nga adlaw kang mga tumandok (International People’s Day).

Ang dinapit nga bisita kag manughambal kang amo nga okasyon amo si Undersecretary Mateo G. Montaño kang Department of Social Welfare and Development.

Ginpaathag ni Montaño ang importante nga hinimu-an kang mga tumandok para sa kauswagan. Tana nagku-on nga ang mga tumandok , makabulig agud aton panumbalikan ang ginhalinan kang pungsod. Hindi naton dapat ikahuya ang istorya kang aton nagliligad.

Si Montaño nagpasiguro nga ang gobyerno handa sa paghimo kang mga programa ukon proyekto agud matuman ang mga kinahanlanun kag kinamatarung kang mga tumandok.

Si Regional Director Alfonso B. Catolin kang National Commission on Indigenous People (NCIP) sa Rehiyon 6 nagpasiguro man sa mga grupo kang Iraynon-Bukidnon nga ang NCIP nagapatigayon kang andang kinahanglanun agud mataw-an kang titulo ang andang lupa sa mga baryo kang Laua-an.

Gindayaw man ni Catolin ang mga pagdumarahan kang probinsya kang Antique sa pagpanguna kang mga programa nga nagapasangyog kang kinamatarung kang mga tumandok parehas kang pagpasar kang ordinansa nga magahiwat kang Indigenous People’s Day kada tuig.

Ginpresentar man ni Vice Governor Rosie Dimamay nga ang Sangguniang Panlalawigan kang Antique ang anda ginpasar nga dugang nga ordinansa kadya nga tuig amo ang pagtukod kang Indigenous People’s Council agud magplano kag magdumara kang mga programa ukon hirikuton para sa mga tumandok.

Sa amo nga kahiwatan ang mga tumandok, nakighambal man sa mga ahensya kang gobyerno kag pribado nga organisasyon agud mapa-utwas ang andang kinahanglanon parehas kang suporta sa edukasyon, ikaayong lawas, pag-angkon kang titulo sa lupa nga anda ginauli-an kag pagprotektar kang andang kinamatarung batok sa pagpang-abuso.

• < Prev
• Next >