NIA nagpangabay sa mga mangunguma sa pagbulig limpyo kang irigasyon

User Rating:  / 0

Details

Created on Monday, 30 May 2011 19:47

Published on Monday, 30 May 2011 19:47

Written by Pilar S. Mabaquiao

Hits: 125

SAN JOSE, Antique – Sa tuyo nga makata-o ka mayad nga serbisyo sa patubig, ang National Irigation Administration nag-apelar sa mga mangunguma kag mga pumuluyo sa pagbulig limpyo kang kanaletas sa irigasyon.

Si Engr. Jose Oredina, hepe kang Antique Irrigation Management Office, nagapangabay gid sa tanan sa paglimpyo kang "irrigation right-of-way" kag itablog ang basura sa husto nga lugar para hindi magsablag sa tayuyon nga pag-ilig kang tubig agud maabot ang bisan marayo nga taramnan.

Ang mga katawhan nga naka patindug kang balay ukon ano man nga istraktura sa nasakupan kang irigasyon dapat maghalin ukon rumpagun ang mga istraktura agud mataw-an ka ligwa ang mga kagamitan kang NIA sa pagpanglimpyo.

Ang mga mangunguma naga reklamo kang mahigku nga tubig nga delikado sa ikaayong lawas tungod sa mga basura nga gintablog sa irigasyon kag mga babuyan ukon manukan nga ginpatindug sa irigasyon mismo.

Ang NIA paagi kay Engr. Andres Bonie O. Tuala nakapakig-angut ron sa natungdan nga gobyeno lokal sa pagpalimpyo kang Sibalom-San Jose Irrigation System – ang isarahanun nga national irrigation system sa Antique nga nagasakup kang anum ka banwa nga may 5,065 ka ektariya nga ginaserbisyuhan nga taramnan.

Ang NIA nagapasarig sa mga mangunguma nga sa andang pagbulig, sanda komitido sa pagta-o kang mayad nga serbisyo sa patubig agud tayuyon nga maagum ang seguridad sa pagkaon.

• < Prev
• Next >