PROVET nagpasanyog kampanya kontra rabies

User Rating:  / 0

Details

Created on Monday, 30 May 2011 19:46

Published on Monday, 30 May 2011 19:46

Written by Pilar S. Mabaquiao

Hits: 131

SAN JOSE, Antique – Ang Opisina kang Provincial Veterinarian nagapasanyog kang kampanya agud madura ang rabis sa Antique sa tuig 2015.

Dya santo sa handum kang World Health Organization sa pagtapna kang rabis paagi sa "Rabies-Free Visayas Island Project" nga ginabuligan kang Bill and Melinda Gates Foundation.

Ginhambal ni Provincial Veterinarian Dr. Romeo Magdato nga ang dya nga programa darwa run ka tuig nga gina implementar sa probinsya kag nagata-o kang libre nga bakuna kontra rabis sa mga ayam. Kang nagligad nga tuig may 36,600 ka mga ayam ang nabakunahan.

Ginsugid man ni Magdato nga ang Bill and Melinda Gates Foundation paagi sa Department of Health nagta-o run ka 2/3 ka bakuna sa rabis sa Antique nga mabakuna kang 26,700 ka mga ayam. Ang nabilin nga 1/3 ipagata-o sa masunod nga binulan.

Ang Antique may kabilugan nga 57,188 ka mga ayam, 70 porciento kadya ukon 40,032 pagabakunahan paagi sa ayuda kang Bill and Melinda Gates Foundation samtang ang nabilin nga 30% ukon 17,156 ka mga ayam paga bakunahan halin sa pundo kang mga lokal nga panguluhan.

Ang PROVET magapanagtag kadya nga bakuna sa kada munisipyo sa masunod nga inadlaw kang Mayo.

Samtang ang Department of Interior and Local Government nagpanaog man kang Memorandum Circular 2011-30 nga nagapanugyan sa lokal nga mga opisyales sa pagtuman kang probisyon sa Republic Act 9482 ukon Anti-Rabies Act of 2007.

Si Secretary Jesse Robredo nagkuon nga dapat gid ang kada lokal nga pamunu-an maghimo kang Rabies Prevention and Control Program kag magata-o kang pundo sa dya nga programa.

Ginamando man kang dya nga Memorandum ang pagpasiguro nga ang tanan nga mga ayam nabakunahan kontra rabis, pagtukod kang "dogpound", pagdumili kang pagbaligya kang karne kang ayam kag pagpatuman kang pinalidad sa mga nagasupak sa mo nga laye.

Ginhinyo gid ni Dr. Magdato ang mga lokal nga opisyales sa pagsuporta sa dya nga lihok.

• < Prev
• Next >