TESDA naghanas kang mga tumandok sa pagrara kang nito

User Rating:  / 0

Details

Created on Friday, 11 November 2011 19:06

Published on Friday, 11 November 2011 19:06

Written by Pilar S. Mabaquiao

Hits: 87

SAN JOSE, Antique --- Ang Technical Education and Skills Development Authority ukon TESDA naghanas kang mga tumanduk sa Barangay Bongbongan I, Hamtic sa pagrara kang nito para madugangan ang andang parangitan-an.

Si Provincial Director Rick Abraham kang TESDA sa Antique naghambal nga ang mga tumanduk nga Ati sa komunidad kang Bongnongan I aram na magrara kang nito tungod ang dya nga tanum nga nagakabud raku sa amo nga lugar, ugaring kinahanglan matun-an nanda ang manami nga pagrara para nga ang andang produkto mangin mabakal sa merkado.

May 24 ka mga Ati ang nagtapos sa 10 ka adlaw nga paghanas nga ginhiwat kang TESDA sa suporta kang Provincial Indigenous People’s Council.

Gindugang hambal ni Abraham nga ikarwa run dya nga paghanas ang anda ginhimu sa mga komunidad kang tumanduk. Ang una ginhimo kang Setyembre sa Sitio Palutsina, Masanag, Hamtic kun sa diin sobra 20 ka mga Ati ang nagtapos sa amo nga hirikuton.

Ang andang produkto parehas kang kalo, dekorasyon sa balay kag iba pa nga sahi nga gamit himo sa nito, anda run gina baligya sa mga tindahan sa probinsya, hambal ni Abraham.

Sa pagtapos kang andang paghanas kahapon, Si Vice Governor Rosie Dimamay naghamabal nga ang probinsya kang Antique nagpa-in kang pondo suporta sa lihuk kang mga tumandok sa pag negosyo kang andang produkto paagi sa Provincial Indigenous People’s Council.

Sa pagpasanyog kang pagrara kang nito, ang mga tumanduk, suno kay Abraham, makakita run kang dugang nga parangitan-an magluwas sa anda pirme ginahimo nga pagpanguma kag pag-obra sa taramnan, pwede man sanda mangin negosyante.

Dapat nanda panginpuslan ang andang natun-an sa amo nga paghanas kag panami-un pa gid ang andang kinaadman para mangin mabakal ang andang produkto, hambal ni Abraham.

• < Prev
• Next >