YEM nagatanyag libre nga paghanas paagi sa TESDA

User Rating:  / 0

Details

Created on Friday, 11 November 2011 18:59

Published on Friday, 11 November 2011 18:59

Written by Pilar S. Mabaquiao

Hits: 99

SAN JOSE, Antique --- Ang Youth Employment and Migration ukon YEM nagatanyag kang libre nga paghanas sa mga kurso nga teknikal paagi sa Technical Education and Skills Development Authority (TESDA).

Suno kay Rick Abraham, Provincial Director kang TESDA, ang probinsya gintaw-an kang 250 ka estudyante nga maka-agum kang libre nga pag eskwela sa mga kurso nga “Shielded Metal Arch Welding, Carpentry, Masonry, Motorcycle Services, Computer Hardware, Food and Beverage kag Commercial Cooking".

Bahol dya nga bulig sa mga Antiqueño ilabi na gid ang mga kabataan nga nag-untat sa pag eskwela tungod sa kaimulon, pagpanglugayawan kang ginikanan agud makakita kang obra ukon iba pa nga rason nga napiritan sanda mag-untat sa pag eskwela, hambal ni Abraham.

Ang anda lang himu-on, kuon ni Abraham, tapuson ang kurso nga anda gin umpisahan kag dapat makapasar sa examiniayon nga igata-o kang TESDA tungod nga ang sertipiko nga anda mabuol pwede nanda magamit sa pagpang-empleyo rudya sa Pilipinas ukon sagwa kang pungsod.

Ang sangka iskolar makabaton kang libre nga bayad sa paghanas lakip na ang bayad sa eksaminasyon kag suporta nga P50.00 kada adlaw.

Ang mga eskwelahan nga katimbang kang TESDA parehas kang St. Anthony's College kag Advance Central College padayun pa nga nagapamaton kang mga gusto mag-agum kang amo nga libre nga paghanas. Amo man ang Training Center kang TESDA sa Villavert Jimenez, Hamtic nga nagapamaton pa kang gusto mag eskwela sa nasambit nga kurso.

Ang interesado nga mga kabataan nga naga-edad 18 hasta 24 anyos pwede mag-agto sa mga nasambit nga eskwelahan sa pagpalista sa kurso nga anda napili-an.

Ang Antique isara sa apat nga mga probinsya sa pungsod nga nakaagum kang amo nga paghanas paagi sa YEM. Dya suportado kang International Labor Organization, International Organization for Migration kag United Nations Children’s Fund, mga ahensya kang gobyerno kag lokal nga pamunu-an.

Ang dya nga programa nagalaum sa pagbulig sa mga pigado nga kabataan para makakita kang parangita-an paagi sa mga nasambit nga paghanas.

Ang iba pa nga probinsya nga naga implementar kang amo nga programa amo ang Masbate, Maguindanao kag Agusan del Sur.

• < Prev
• Next >